مسلسل باب الحارة6 جزء2

مسلسل باب الحارة6
الحلقة الثانية

في بيتنا ...فيس بوك !
كتبها / مصطفى بونيف

نشاهد ابنتي أبي عصام تجلسان أمام شاشة الكمبيوتر وهما تفتحان صفحة الفيس بوك
البنت الصغرى: يضرب هالفايس بوك مفيش ولا شب حليوة يملى العين، لك يقبر عظامي توم كروز ما فيه مثلو شاب حلو، يبعثلها حمة نيكول كيدمان منين جالها هالقلب وخلعتو، لك لو كان زوجي توم كروز ما يخلعه مني إلا ملك الموت.

البنت الكبرى: بدك شاب مثل توم كروز، والله والله ما رح يأخذك إلا بشير ابن أبو بشير، وهادول عندهم السمنة بالوراثة، كلها شهرين بعد الزواج وتشوفيه داخل عليك الغرفة مثل التور وفي ايده هامبرجر، ويقولك وهو بياكله يا الله حضري لنا العشا.

تنظر البنت الكبرى في الشاشة: لك شوفي جميلة، فيه شاب حلو بيطلب اضافة شو رأيك اضيفه؟

تجيبها :- لك اتقلي عليه شوي، تلاقيه باعثلك رسالة بيترجا عطفك وحنانك

وبعد لحظات قليلة تصرخ البنت الكبرى: لك شوفي بعثلي رسالة إلهي يقبر عظامي ويعدمني ياكي في يوم واحد.
ثم تقرأ الرسالة بصوت مليئ باللهفة والشوق: " عزيزتي، كنت أقوم بعملية ريسيرش على الفيس بوك على أحلى بنت، حتى طلعت صورتك تقبريني شو حلوة، قلبي دق لك ياريت تعملي له اضافة تلاقيني أون لاين"
تتنهد بوران (البنت الكبرى) ثم تقول : يا الله شو رومانسي!!

تسألها الصغرى في بلاهة: شو معناتها رومانسي؟
- معناتها مثل مهند تبع المسلسل التركي، فهمت؟

ثم تصرخ : ليك أهه دخل أوف لاين إلهي لا تعدمني إياه
يرسل لها : مسا الخير
- مسا النور
معاك أمجد 29 سنة، ضابط طيار، ساكن بفيلا في أول حارة الذيب المخلوع، حلو قد ماني حلو الشباب بينادوني يقولولي يا توم، من فرط شبهي بتوم كروز
- الله ياريتنا جبنا سيرة مليون دولار قبل شوية كنت مع رفيقتي عم نحكي على توم كروز يقبرني

- ممكن تعرفيني بحالك؟
-

اسمي راما، عمري بين 18 وال25 سنة، بشتغل مضيفة طيران بالخطوط القطرية، بس بابا منعني من هيك شغل لأنهو بيقول أنه البنت إذا طلعت من حارتها تستاهل البوس أقصد الموت.
تثور البنت الصغرى: شو؟ اسمك راما يا بايرة، وعمرك 18 سنة، إذا إنت عمرك 18 سنة أديش يبقا عمري شهرين؟، لك إنت يا اللي طبخت وليمة طهور الزعيم أبو صالح لما كان عمره سبع تيام
تتأفف بوران ثم تقول لها: لك قومي من جنبي إلهي تقوم قيامتك، لك أنا حضرت وليمة طهور الزعيم؟ والله والله لأقول لماما عن مواعيدك مع بشير من ورا الباب وهو جايب لنا البيتزا دلفري..

والله رح أخلي عمي أبو بشير يبطل شغلانة الدليفري كلها طول عمره.

يرسل لها الشاب: هيدي صورتك، الله شو حلوة!!!
البنت الكبرى: الحمد لله طلع حمار ما بيعرف سمية الخشاب أنا عاملة داونلود لصورتها من جوجل.

ثم نشاهد أبو عصام في مجلس كبار الحارة وهو يقدم لهم محاضرة عن تربية البنات...
أبو عصام : البنات يا جماعة تربيتهن ماني سهلة بنوب، مشان هيك ضروري يكون فيه شيئين، وهم ثلاثة أشياء، مراقبة البنت، لا تخليها تروح من عينك، لأنه إذا راحت عليك نومة رح تصحا تلاقيها جايبة شاب تحت باطها وتقولك هذا البوي فرند تبعي.
يهمس أبو بشير في اذن العقيد: شو معناتها بوي فراند عقيد؟
فيجيبه العقيد : الكلمة هيدي لو تفهموها رح تصيرو كلكم عقداء، والحارة يكفيها عقيد واحد يا أبو بشير.
يتدخل الزعيم: أيام زمان كان الواحد لما يخطب واحدة تفضل البوسة جوات فمه لغاية ما تصير شفايفه قد الكوساية، نحنا في زمن ما يعلم بيه إلا اللي خلقه صارت البوسة توصل بالبلوتوث، تصير بنتك تتباس قدامك وأنت لا خبر.

نشاهد البنتين وهما لازلتا تدردشان مع الشاب...
يرسل لها : ممكن نتقابل، أنا غرضي شريف بدي أعزمك على بيتزا؟
البنت الكبرى: - بيتزا، واو أنا كثير بحبها، موافقة.
- ممكن رقمك حتى ارسل لك مستكول؟
البنت : شو رايك نكتب أرقامنا بنفس اللحظة ونتصل ببعضنا ونشوف من فينا اللي يتصل الأول؟
الشاب : اوكيه...واحد ، اثنين ، ثلاثة...
ثم يكتبان رقميهما ويظرهان على نافذة الدردشة...
تصرخ البنت الصغرى: ولي على آمتي هيدا رقم أخونا المعتز...ولي ولي ولي...
ثم نسمع صوت المعتز وهو يصرخ : يا باطل يا باطل.

نلتقي في حلقة قادمة
ان كتب لنا عمر

» مسلسل باب الحارة6